Халыҡ һорауы ҡәнәғәтләндерелә
21 августа 2015 йыл | Сәйәсәт

"Берҙәм Рәсәй” сәйәси партияһының "Реаль эштәр" проектын ғәмәлгә ашырыуы хаҡында гәзитебеҙҙә хәбәр иткәйнек инде.

Польшаның мөнәсәбәте үҙгәрерме?
12 августа 2015 йыл | Сәйәсәт

"Ислам дәүләте”боевиктарына ҡаршы берлектәге көрәш планы барлыҡҡа килеүе, Польшала Анджей Дуданың инаугурацияһы булыуы, Мария Гайдарҙың Украина гражданлығы алыуы уҙған арауыҡтың мөһим ваҡиғалары рәтендә торҙо.

НАТО Төркиәгә ярҙам итерме?
29 июля 2015 йыл | Сәйәсәт

Төркиәнең Сүриәгә ҡаршы һауанан һөжүм итә башлауы һәм икенсе фронт асып, НАТО көстәрен йәлеп итергә ынтылыуы, АҠШ менән Куба араһында дипломатик мөнәсәбәттәрҙең яйлана төшөүе, Франция парламенты депутаттарының Мәскәүгә һәм Ҡырымға килеп ҡайтыуы үткән арауыҡтың мөһим ваҡиғалары рәтендә торҙо.
Ике яҡлы фронт
28 июлдә Брюсселдә НАТО илдәренең махсус вәкилдәре ашығыс кәңәшмәгә йыйылды.  Төп сәбәп - Төркиәнең НАТО-нан ярҙам һорауы. Билдәле булыуынса, Төркиә Европа Союзында ағза булып тормаһа ла, күптән НАТО ағзаһы. Шуға ла төнъяҡ альянс етәкселегенән ярҙам һорамаҡсы булды. Төркиә полицияһы киң масштаблы махсус операция башланы һәм ул  терроризмға ҡаршы йүнәлтелгән. Ҡоро ер хәрби операцияһынан тыш Төркиә Сүриәне һауанан утҡа тота башланы. Сүриәнең Төркиә менән сиктәш райондарында "Ислам дәүләте” боевиктарының базалары урынлашҡан. Төркиә был боевиктарҙың күпләп үҙ иленә үтеп инеүенән шөрләй. Шул уҡ ваҡытта Төркиә Президенты Тайып Эрдоганды "Ислам дәүләте” боевиктары менән йәшертен бәйләнеш тота икән, тигән хәбәрҙәр ҙә йөрөй. Ул боевиктар ҡулы менән үҙенең ике төп дошманын – курдтарҙы һәм Сүриә Президенты Бәшәр Әсәдте төп башына ултыртырға ниәтләнә. Бәшәр Әсәд иһә үҙ армияһын тулыландырыу маҡсатында хеҙмәттән ситләшеүселәр өсөн амнистия иғлан иткән һәм Сүриәләгеләр өсөн 30 көн, сит илдәргә ҡасып сығып китеүселәр өсөн 60 көн ваҡыт биргән. "Дизертирҙар”ошо арауыҡта власть вәкилдәренә килеп баш һалырға тейеш. Ә Төркиә полицияһының киң масштаб-
лы операция башлауы 21 июлдә булып үткән терактҡа бәйле. Теракт һөҙөмтәһендә 30 кешенең ғүмере ҡыйылды. Төркиәлә һуңғы тиҫтә йылдағы иң ҙур теракт был. Ошоноң менән бәйле Төркиә үҙ биләмәһендәге АҠШ хәрби базаларына Сүриәне һауанан утҡа тотоуҙы рөхсәт итте. Быға тик-лем АҠШ Төркиә биләмәһендәге хәрби базаларын техника ремонтлау һәм разведка өсөн генә файҙалана ине. Хәҙер иһә НАТО көстәре лә Төркиә хәрбиҙәренә ярҙамға килһә, Анкара бер атыуҙа ике ҡуянды юҡ итергә ниәтләнә. Берҙән, ул "Ислам дәүләте” боевиктарын көсһөҙләндерһә, икенсенән, эске дошманды – курдтарҙы "ауыҙлыҡлап” алырға  өмөт итә. Тик быға юл ҡуймаҫтар шул. НАТО-ның Генераль секретары Йенс Столтенбрг төнъяҡ альянс көстәрен эске проблемаларҙы – курдтарға ҡаршы көрәш өсөн файҙаланыуҙы тыйҙы. Германия канцлеры Ангела Меркел шулай уҡ курдтар мәнфәғәтен яҡлап сығыш яһаны. Төркиә Премьер-министры Әхмәт Давутоглу курдтарҙың төп хәрби көстәре урынлашҡан Ираҡҡа ҡаршы һөжүм башларға ынтыла. Президент Тайып Эрдоган да уның был ниәтен хуплай. Уларҙың икеһе лә курдтарҙың көсәйеп китеүенән шөрләй. Быйыл булып үткән парламент һайлауҙарында курдтар өҫтөнлөк иткән Халыҡ демократияһы партияһы 10 процент барьерҙы үтеп, парламентҡа үтеп инде һәм Тайып Эрдоганға бер фирҡәле (Ғәҙеллек һәм үҫеш партияһы) Хөкүмәт ойоштороуға ҡамасауланы. Шуға ла Төркиә етәкселеге хәрби көс менән "Ислам дәүләте” боевиктарына ҡаршы көрәшеү һылтауы менән курдтарҙы көсһөҙләндереүҙе лә маҡсат итеп ҡуя.
"Азатлыҡ утрауы”
азатлыҡҡа ынтыла
АҠШ менән Куба араһында дипломатик мөнәсәбәттәр яйланырға тора. Президент Барак Обама үҙе власта саҡта быны эшләп ҡалырға ашыҡҡанға оҡшай. Ни өсөн тигәндә, илдең оппозицияһы уны тышҡы сәйәсәтте дөрөҫ алып бармауҙа гел тәнҡитләп килде. Ошоға яуап итеп ул Куба менән мөнәсәбәттәрҙе нығытып ҡалырға ниәтләнә. Июль айында ике ил араһында илселектәр булдырыу тураһында ла һүҙ булды. АҠШ менән Кубала илселектәр бөтөрөлөүгә лә 54 йыл ваҡыт үтеп киткән. 2016 йылда Барак Обама эш сәфәре менән Кубаға барырға йыйыныуын белдергән. Әле ике ил араһында банк системаһын яйға һалыу эше башланған. Юғиһә быға тиклем ике ил араһындағы сауҙа бәйләнештәренең финанс системаһы өсөнсө ил аша башҡарыла ине һәм был тауар хаҡтарында ла кире сағылыш тапмай ҡалманы. Бынан ары Вашингтон менән Гавана араһындағы тауар әйләнеше күләме артыр тип көтөлә. АҠШ Кубаны терроризмға булышлыҡ итеүсе илдәр исемлегенән һыҙып ташлауы ла ике ил араһындағы мөнәсәбәттәрҙе яйларға булышлыҡ итте. Ҡыҫҡаһы, ут күршеләр булған, ҡапма-ҡаршы ҡоролошло был ике дәүләт араһында өр-яңы этап башланырға тора. "Азатлыҡ утрауы” тип нарыҡланған илдең ысын мәғәнәһендә азатлыҡҡа ынтылыу күренеше был.
Француздар Ҡырымға килде
23 июлдә Мәскәүгә Франция парламенты депутаты Тьерри Мариани етәкселегендәге делегация килде. Башта улар Дәүләт Думаһы эшмәкәрлеге менән танышты, парламент спикеры Сергей Нарышкин менән фекер алышты. Һуңынан улар Ҡырымға юлланды. Франция депутаттары Ҡырымдағы хәлде үҙ күҙҙәре менән күргәндән һуң ярым утрауҙың Рәсәйгә законлы ҡушылыуын билдәләнеләр.Улар ҡайтып, күргән-кисергәндәрен үҙ илдәрендә лә, Европа парламентында ла һөйләйәсәк. Тик бына Украинала ғына быны һөйләй алмаясаҡтар. Сөнки Украина Юғары Радаһы Ҡырымға килеп ҡайтыусы Франция депутаттарын үҙ иленә индереүҙе тыйҙы. Шулай итеп, Европаға ынтылған, Европаса йәшәргә уҡталған Украина үҙҙәрендәге демократияның Европаса түгеллеген иҫбатланы ла ҡуйҙы.

Самат ҒӘЛИУЛЛИН.

Һорауҙарҙа көнитмешебеҙ сағыла
27 июля 2015 йыл | Сәйәсәт

Гәзитебеҙҙә хәбәр итеүебеҙсә, 23 июлдә район хакимиәте бинаһында "Берҙәм Рәсәй” партияһы рәйесе Д.Медведевтың төбәк йәмәғәт ҡабул итеү бүлмәһе рәйесе, Башҡортостан Республикаһы Дәүләт Йыйылышы-Ҡоролтай депутаты, М.Аҡмулла исемендәге Башҡорт дәүләт педагогия университеты ректоры Раил Мирвай улы Әсәҙуллин граждандарҙы ҡабул итте. Ректорға үҙҙәрен борсоған һорауҙар менән тиҫтәгә яҡын кеше мөрәжәғәт итте.
Граждандарҙы ҡабул итеүҙә шулай уҡ район хакимиәте башлығының социаль мәсьәләләр буйынса урынбаҫары Руслан Салауатов, "Берҙәм Рәсәй” фирҡәһенең урындағы бүлексәһе етәксеһе Әхәт Нуриев ҡатнашты.
"Тепловодоснабжение” МУП-ы етәксеһе С.О.Афанасьев менән баш инженер А.В.Безовчук  ике мәсьәләне хәл итеүҙә ярҙам һорап мөрәжәғәт итте.
Улар Красноусол ауылының  ҙур темп менән үҫеүен билдәләп үттеләр һәм ошоноң менән бәйле килеп тыуған проблемаларҙы бәйән иттеләр. 1973 йылда төҙөлөп, йылдан-йыл ҡеүәте кәмей барған биологик таҙартыу ҡоролмаларын яңыртыу өлгөрөп еткән мәсьәлә, уға майҙансыҡ, ер участкаһы ла бүлеп бирелгән.
"Тепловодоснабжение” етәкселеге проекттар әҙерләүгә финанс сығымдары табыуҙарын, әммә 2015 йылға республика адреслы инвестиция программаһына инә алмауҙарын билдәләп үтте. Шулай уҡ 2-се, 6-сы ҡаҙанлыҡтар ҙа яңыртыуҙы талап итә.
Р.М.Әсәҙуллин МУП етәкселегенә БР Хөкүмәтенә был проблемаларҙы аныҡ итеп күрһәтеп, үтенес хаты әҙерләргә, шулай уҡ беҙҙең төбәк буйынса БР Дәүләт Йыйылышы-Ҡоролтай депутаты Ә.М.Ишемғоловҡа мөрәжәғәт итергә ҡушты. "Был мәсьәләне хәл итеү өҫтөндә мотлаҡ бергәләшеп, министрҙар һәм башҡа яуаплы хеҙмәттәр менән эшләйәсәкбеҙ”, - тип вәғәҙәләне Раил Мирвай улы.
Красноусолда йәшәүсе тормош иптәше 1 төркөм инвалиды М.Х.Фәтҡозаманов исеменән ҡатыны К.Б.Казымова торлаҡ мәсьәләһе менән килгән. Уларҙың ғаиләһе Ҡаҙағстандан мәжбүри күсеп ҡайтып, туғандарының бәләкәй генә өйөндә йәшәй. Район хакимиәтендә торлаҡ комиссияһында иҫәпкә ҡуйылыуын-ҡуйылғандар, әммә бындай категория граждандарға республиканан квоталар әҙ бүленә. Раил Әсәҙуллин шулай уҡ мәжбүри күсенеүсе булараҡ был мәсьәләне хәл итеү йәһәтенән бәлки, республиканан районға күберәк аҡса бүленерен күҙ уңында тотоп, ғариза яҙырға тәҡдим итте.
Красноусолдағы 1-се урта мәктәп директоры Г.В.Петрова БДПУ-ны тамамлаусыларҙың эшкә урынлашыуы менән ҡыҙыҡһынды. Уны нигеҙҙә мәктәптең көслө үҙ сығарылыш уҡыусыларының тыуған мәктәптәренә эшкә ҡайтмауы, ә ҡала мәктәптәренә барыуы борсолдора. Ректор был тәңгәлдә абитуриенттар менән 4-се курстан, практика ваҡытында эшләргә кәрәклеген билдәләп үтте. Г.Петрова шулай уҡ мәғариф учреждениелары өсөн милеккә һалым һалыу мәсьәләһен дә күтәрҙе.
Красноусол башҡорт гимназия-интернаты уҡытыусылары И.И.Вафина менән Р.Ф.Сундукова БДПУ менән гимназия араһында хеҙмәттәшлек булдырыу тәҡдиме менән килгән.
БДПУ-ға документтарын тапшырған бер нисә сығарылыш уҡыусыһы үҙҙәренең был юғары уҡыу йортона инеү мөмкинлеге булыу-булмауын белеште. Раил Мирвай улы телефон аша үҙе етәкләгән уҡыу йортоноң ҡабул итеү комиссияһы менән бәйләнешкә инеп, шундуҡ яуап бирҙе.
БДПУ ректоры был уҡыусыларҙың Берҙәм дәүләт имтиханы һөҙөмтәләренән сығып БДИ-ны тапшырғанда уҡыусыларҙың күпселеге 3 кенә дисциплинаны һайлай, ә юғары уҡыу йортона еңелерәк инеп китеү өсөн 4-те тапшырырға кәрәк, тигән теләген белдерҙе.
Ҡабул итеүҙә башҡа һорауҙар ҙа ҡаралды.
Индира ИШКИНА.

Ҡырым өсөн ҡыҫымға алмаҡсылар
20 июля 2015 йыл | Сәйәсәт

Баҡы ҡалаһында Европа уйындары барыуы, НАТО көстәренең илебеҙ сигенә яҡынлауы, Европа Союзының илебеҙгә ҡарата иғлан иткән санкцияһын оҙайтыуы иғтибар үҙәгендә булды.
Әзербайжан спортсыларҙы тупланы
Үткән аҙнала донъяны шаулатҡан бер ваҡиға – Баҡы ҡалаһында I Европа уйындарын асыу тантанаһына туҡталып китеү кәрәктер. Әйтергә кәрәк, Әзербайжандың баш ҡалаһына 49 илдән меңәрләгән спортсы йыйылды. Улар 20 спорт төрө буйынса 253 миҙал комплекты өсөн көрәш алып бара һәм уйындар 28 июнгә тик-лем дауам итә. Европа уйындарында илебеҙҙән 350 спортсы ҡатнаша. 23 июнгә ҡарата дөйөм миҙалдар һаны буйынса ватандаштарыбыҙ беренсе урында килә. Владимир Путиндың был сарала үҙе ҡатнашыуы ҙур мәртәбә булды. Ә бына спорт байрамы "Европа
уйындары” тип аталһа ла, унда Европа Союзы илдәре етәкселәренән берәү ҙә ҡатнашманы. Баҡыла сағында Владимир Путин Әзербайжан Президенты Илһам Әлиев менән рәсми осрашыу уҙғарҙы, ике ил араһындағы мөнәсәбәттәрҙе тикшерҙе. Киләсәктә ике ил араһындағы тауар әйләнешен арттырыу күҙаллана. Һуңғы йылдарҙа илебеҙ Әзербайжанға ҡарағанда Әрмәнстан менән нығыраҡ аралашты һәм яҡынайҙы. Әрмәнстандың Белоруссия, Ҡаҙағстан артынса Евразия Союзына ағза булып инеүе лә күп нәмә хаҡында һөйләй. Ә Әзербайжан менән Әрмәнстан араһынан күптән инде "ҡара бесәй” үткән һәм был ике ил әленән-әле биләмәләр буйынса низағҡа инеп тора. Әрмәнстан Рәсәй менән бер союзда торғанлыҡтан, Әзербайжан яғы быға ҡырын күҙ менән ҡарай ине. Владимир Путин Илһам Әлиев менән осрашыу барышында күҙгә күренмәгән "кәртәләрҙе” емереп ташларға тырышты ла инде.
Ҡайһы саҡ кинәйәләп әйтеү ҙә етә
Баҡыла сағында илебеҙ етәксеһе тағы ла бер мөһим – Төркиә Президенты Тайып Эрдоган менән осрашыу уҙғарҙы. Был осрашыу ике яҡ өсөн дә бик мөһим. Сөнки Болгария кире ҡаҡҡандан һуң "Көньяҡ ағым” газ үткәргесе Төркиә биләмәһе аша уҙырға тейеш. Осрашыу барышында "Көньяҡ ағым” газ магистрален һуҙыу, Сүриәләге хәлдәр һәм башҡа мәсьәләләр ҙә тикшерелде. Төркиә менән сиктәш Сүриәлә оҙайлы һуғыш бара. Илебеҙ Сүриә Президенты Бәшәр Әсәд алып барған сәйәсәтте хуплай. Әле Ираҡ һәм Сүриәнең байтаҡ биләмәләре "Ислам дәүләте” боевиктары тарафынан баҫып алынған. Ошондай шарттарҙа Төркиә өсөн күрше дәүләттәр менән уртаҡ тел табыу мөһим. Етмәһә, яңыраҡ булып уҙған һайлауҙарҙа курдтар партияһы парламентҡа үтеп инде. Тайып Эрдоган өсөн был ауыртмаған башҡа тимер таяҡ менән бер. Сөнки быға тиклем парламентта өс кенә партия булһа, хәҙер дүртәү һәм президентҡа үҙе теләгән закондарҙы ҡабул итеү бик ауырға төшәсәк. Курдтар партияһы иһә Төркиәлә төрлө яҡлап ҡыҫырыҡланған төрлө милләт халыҡтарын берләштерә. Төркиәнең һаман да Европа Союзына ҡабул ителмәүе лә борсой президентты. Владимир Путин ошо мәсьәлә буйынса Эрдоганға "төрттөрөп” алырға ла өлгөрҙө. Был тема Тайып Эрдогандың иң ауыртҡан урыны икәнлеген белһә лә. Эйе, илебеҙ етәксеһе ҡайһы саҡта төртмә телле булырға ла, юмор аша кинәйәләп әйтергә лә булдыра. Һәйбәт дипломат булыр өсөн былары ла кәрәктер.
НАТО өҫтәмә ҡораллана
Үткән аҙнала хәүефҡа һалған ваҡиғалар ҙа булды. НАТО көстәренең Европаға уҡтала башлаған мәлендә ҡойма ямғыр һөҙөмтәһендә Тбилиси, Мәскәү ҡалаларын һыу баҫыуы үтә лә ваҡ мәсьәлә булып күренә. АҠШ Көнсығыш Европа һәм Балтик буйы илдәрендә ауыр хәрби техникаһын урынлаштырыр өсөн мөмкинлектәр эҙләй. Пентагон Болгария, Латвия, Литва, Польша, Румыния һәм Эстонияла БМП һәм танктарын урынлаштырырға йыйына. Был хаҡта Пентагон етәксеһе – АҠШ-тың оборона министры Эштон Картер белдерҙе. 24-25 июндә Брюссель ҡалаһында НАТО илдәренең оборона министрҙары осрашыу уҙғарырға тейеш һәм унда был мәсьәлә хупланыр тип көтөлә. НАТО-ның өҫтәмә ҡоралланыуы "Рәсәй агрессияһы”нан һаҡланыу өсөн эшләнә. Барак Обама илебеҙҙә уларға ҡарата "агрессия көсәйеүе”н күргән. Ошондай шарттарҙа теләйме, теләмәйме илебеҙгә лә яуап аҙымы эшләргә тура килә. Үткән аҙнала Владимир Путин быны эшләне лә инде. "Армия-2015” хәрби-техник форумында сығыш яһап былай тине: "Булған ядро ҡоралына өҫтәп быйыл илдең Ҡораллы Көстәре 40-лап яңы континент-ара ракеталар менән тулыланасаҡ”. Был инде өҫтәмә ҡоралланыу тигән һүҙ һәм уның яҡшыға алып килмәйәсәге көн кеүек асыҡ.
Санкциялар оҙайтыла
22 июнь илебеҙ өсөн "ҡара” көндәрҙең береһе. Бөйөк Ватан һуғышы башланыуҙың, кешелек тарихында иң ҡан ҡойғос һуғыштың башланыу көнөндә Европа Союзы илебеҙгә ҡарата былтыр август айында иғлан ителгән санкцияны 2016 йылдың 31 ғинуарына тиклем оҙайтыу тураһында ҡарар ҡабул итте. Көнбайыштың бындай ҡарарына илебеҙ етәкселеге шунда уҡ яуап бирҙе. 22 июндә РФ Хөкүмәте Рәйесе Дмитрий Медведев АҠШ һәм ЕС илдәренә (28 ил), шулай уҡ Норвегия, Австралия һәм Канадаға ҡарата яуап санкцияһы иғлан ителеүен белдерҙе. Санкциялар һөҙөмтәһендә был илдәрҙең айырым тауарҙарын илебеҙгә индереү тыйыла. Санкцияларҙың эҙемтәләре ил иҡтисадында ла сағылыш табасаҡ. Уның ыңғай яғы күберәк булырмы, кире яғымы, ваҡыт күрһәтер.
Самат ҒӘЛИУЛЛИН.
качественныешаблоны для dle 9.5 бесплатно
1 ... 4 5 6 7 8 9 10 11 12 ... 26